بحاول أخفي إعجابي

بحاول أخفي إعجابي
وأقول أتقل وأدس البي
تسوقني اللهفة لي عينيك
ويظهر ليك حنين عيني
ويدفق شوقي واغرق بيك
من فوق راسي لي كرعي
......
أداري الشوق وأغيب أيام
عشان في العين أشوف شوقك
أجيك مشتاق قبل تشتاق
وينساب دمي في عروقك
ويحوم خاطرك يلاوي خطاي
ويسوقني قبل يجي يسوقك
حبيب عينيا لو تعرف
بموت بي شوقو معشوقك
......
بشوفك في عيون الناس
وفي المطرة ونسيم الليل
بشوفك في عيون أطفال
بيلعبو بالبراءة شليل
حناني بزيد مع الأيام
و ريدك شفت منو الويل
وأساهر في الليالي وانوح
مع الوجع البهد الحيل
........
بريدك زي عيوني وأكيد
براك إنت الملكت هواي
وما شايل هموم الكون
مدام عينيك جنبي حداي
بلاك يا روحي ما بتقدر
دروب الريدة تمشي خطاي
وشايل ليك كل الريد
بتحلى الدنيا وإنت معاي
..