كتب شاعرنا حسن الزبير رحمة الله عليه :

انشالله القيامة تقوم
عشان ريدك معاي مابدوم
ناس سهرانة طوالي
وناس طول الليالي تنوم
أشوف انا كيف حسابك يطول
علي الوعد الدوام ممطول
وأنا الشايف كتير أحباب
بعيشو الريدة عرض وطول
أنا الشايل دوام همك
وأريدك ريدة زي امك
واغير من غيرتي ذاتها عليك
أخاف انا يالخفيف دمك
انشالله القيامة تقوم
وكل زول يمشي في حالو
عشان ماقلبي يرجع يقول
حبيب الدنيا في بالو ..

فرد عليه فرح شادول بقصيدة ( الحسادة تطير ) :

انشالله الحسادة تطير
وايام السعادة تدوم
والضاق الحزن في الريد
بكرة يعيش ويشبع نوم
بتدور القيامة تقوم
عشان حظك شقي ومشئوم
وفتحن ليك بنات حوا
وجافاك ليلة واحدة النوم
بس داير القيامة تقوم
نحنا ولاعرفنا جديد
ولازيك عشقنا الغيد
وحبينا القريب وبعيد
ولاضمانا حضن الليل
مع الوجه البهي وغريد
ولالليل شكينا حبيب
اذا حتي العشقنا عنيد
انشالله الحسادة تطير
وتكبر وتنسي يازغبير

رد عليه شاعرنا حسن الزبير بقصيدة (القيامة 2) :
انشالله القيامة تقوم
وعشمي في الله ماشوية
ادخل جنة المأوي
وهناك يدوني حورية
أتكي في الارائك أنوم
بكل حبور وحرية
أرتاح من دا مافي وقوم
وأمش جيب لي وجيب لي
أفارق دنية المعدوم
والقي مطالبي بالنية
ولو حنيت للحم الطير
تجينى الطيرة مشوية
عشانك كية يادكتور
تكون حوريتى خمرية
يجرجر ديسها دا المردوم
ولهجتها خالصة عربية
اخلي لك بنات حواء
تحاحي صباح وعصرية
وتبقي عواطلي يادكتور
هناك لامرضة لاشكية
ولاعشوائي في الخرطوم
ولا لفحات سمومية
هناك حتى الرحيق مختوم
هناك لاقروش لاماهية
صفي النية يامهجوم
بلاش هجمات هبوبية
وانشالله القيامة تقوم
وتنجح مية في المية

رد عليه شاعرنا فرح شادول بقصيدة (مامقبولة اعذارك ) :
مامقبولة اعذارك
ومامعروف مصيرك وين
وماهي صالح اعمالك
عشان يدوك حورا عين
وانت علي الصراط ماشي
وشركوا ليك ببنية
حتختل كل حساباتك
وتحتل حتلة ادبية
اما لو ضرب حظك
وجابو لك بنات الحور
تموت واقف علي طولك
ويشيلك حيلك المشلول
وتفوت القيامة عليك
واقف انت تتلفت
ديك قوامها سمهر وطول
وديك دعج العيون مكحول
وديك من فيها حسن القول
وديك خليها لشادول
وديك شعرا كمان خلي
قدر مايزيد نعومة وطول
عذابنا وليلنا فيه يطول
ارجع لحلو كلامك
معقولة القيامة تقوم
قبل ماتلقي احلامك